khulega nakhun-e-shamshir se uqda mire dil ka
kisi qatil se hai asan hona meri mushkil ka
pas-e-murdan bhi ye manzur hai nazzara qatil ka
charagh-e-gor men aalam hua hai chashm-e-bismil ka
ghubar-e-dahr se ik lahza bhi khali nahin hota
ilahi shisha-e-saat hai kya shisha mire dil ka
yahi gar zindagi bhar tab-e-ali ka raha aalam
banega mar gae par asman dasvan mire gil ka
na tode rishta-e-dam aur apna yaar dam tode
hai behtar is bhadakne se tadapna tair-e-dil ka
jahan men kamilon ko qadr hai ham khaksaron ki
shikast-e-dil-gada ko tutna hai saghar-e-gul ka
ajab hai ru-e-janan par na hona ek bhi til ka
adam karta nahin taron ko jalva mah-e-kamil ka
qayamat laega gulzar men naala anadil ka
jagana fitna-e-khvabida hai sayyad-e-ghafil ka
main majnun dekhte hi mar gaya is rashk-e-laila ko
kafan ke vaste goya phata tha parda mahmil ka
kiya labrez-e-marvarid chashm-e-gauhar afshan se
guman guzra jo dariya par mujhe daman-e-sahil ka
mira khvab-ul-aziz o ghairat-e-khvab-e-zulekha hai
tasavvur raat bhar tha mujh ko ik yusuf-shamail ka
main aisa na-tavan huun sar uthana mujh ko mushkil ho
bara-e-tauq gardan chahiye chhalla anamil ka
kafan misl-e-katan hai tukde tukde ‘arsh’ madfan men
tasavvur mar gae par bhi hai ye us mah-e-kamil ka
Leave a Reply