ye inqalab bhi ai daur-e-asman ho jaa.e
mira qafas bhi muqaddar se ashiyan ho jaa.e
ma.al-e-zabt-e-fughan marg-e-na-gahan ho jaa.e
kisi tarah to mukammal ye dastan ho jaa.e
samajh to lenge vo mujh se agar bayan ho jaa.e
sukut had se guzar jaa.e to ziyan ho jaa.e
qafas se duur sahi mausam-e-bahar to hai
asiro aao zara zikr-e-ashiyan ho jaa.e
diya hai dard to rang-e-qubul de aisa
jo ashk aankh se Tapke vo dastan ho jaa.e
zaban-e-ḳhushk bhi jumbish men la nahin sakte
ye bebasi bhi na minjumla-e-fughan ho jaa.e
qafas bhi bigḌi hui shakl hai nasheman ki
ye ghar jo phir se sanvar jaa.e ashiyan ho jaa.e
nigah-e-garm se dekho na ashk-e-hasrat ko
ye chahte ho ki ye os bhi dhuan ho jaa.e
hayat nok-e-mizha tak hai ashk-e-rangin ki
palak zara si bhi jhapke to ra.egan ho jaa.e
‘siraj’ dekh lo be-ansuon ke bhi ro ke
ye sa.i bhi na kahin sa.i-e-ra.egan ho jaa.e
Leave a Reply