tum se rah-o-rasm baḌha kar divane kahla.en kyuun
jin galiyon men patthar barsen un galiyon men jaa.en kyuun
vaise hi tarik bahut hain lamhe gham ki raton ke
phir mere ḳhvabon men yaaro vo gesu lahra.en kyuun
majburon ki is basti men kis se puchhen kaun bata.e
apna mohalla bhuul ga.i hain be-chari laila.en kyuun
mustaqbil se aas bahut hai mustaqil kaisa bhi ho
maazi kis ke kaam aaya hai maazi ko dohra.en kyuun
haan ham ne bhi aaj kisi ka nazuk sa dil toḌa hai
shahr-e-vafa ki rasm yahi hai ham is par sharma.en kyuun
khiḌki khiḌki sannaTa hai chilman chilman tanha.i
chahat ki mahfil men ab ham naqd-e-dil-o-jan laa.en kyuun
va.adon ke jangal men ‘azar’ ham to barson bhaTke hain
aap karen kyuun dil pe bharosa aap ye dhoka kha.en kyuun
Leave a Reply