Rasa Chughtai
ḳhvab us ke hain jo chura le jaa.e
niind us ki hai jo uḌa le jaa.e
zulf us ki hai jo use chhu le
baat us ki hai jo bana le jaa.e
tegh us ki hai shaḳh-e-gul us ki
jo use khinchta hua le jaa.e
us se kahna ki kya nahin us paas
phir bhi darvesh ki dua le jaa.e
zaḳhm ho to koi duha.i de
tiir ho to koi uTha le jaa.e
qarz ho to koi ada kar de
haath ho to koi chhuḌa le jaa.e
lau diye ki nigah men rakhna
jaane kis samt rasta le jaa.e
dil men abad hain jo sadiyon se
un buton ko kahan ḳhuda le jaa.e
kab na jaane ubal paḌe chashma
kab ye sahra mujhe baha le jaa.e
ḳhvab aisa ki dekhte rahiye
yaad aisi ki hafiza le jaa.e
main gharib-ud-dayar mera kya
mauj le jaa.e ya hava le jaa.e
ḳhaak hona hi jab muqaddar hai
ab jahan baḳht-e-na-rasa le jaa.e
Leave a Reply