Mohammad Usmaan Arif
tasavvur men ye kaun aaya zaban par kis ka naam aaya
nashat-e-ruh ka har ik nafas le kar payam aaya
vafur-e-be-ḳhudi men ek aisa bhi maqam aaya
na duniya mere kaam aa.i na main duniya ke kaam aaya
aqidat se jabin jhuk jhuk ga.i rah-e-mohabbat men
jahan un ka ḳhayal aaya jahan un ka maqam aaya
zamane ko to duniya-bhar ki ḳhushiyan baḳhsh diin tu ne
mire hisse men aaya bhi to soz-e-na-tamam aaya
raha kuchh hosh bhi baaqi to un ke husn-e-zeba ka
agar aaya to lab par be-ḳhudi men un ka naam aaya
gham-e-dauran gham-e-duniya gham-e-hasti ghalat Thahre
jahan ki gardishen Thahrin jahan gardish men jaam aaya
nigahon par jamal-e-dost parda ban ke chhata hai
sambhalna dekhna ‘arif’ baḌa mushkil maqam aaya
Leave a Reply