Shoaib Nizam
ye dhund ye ghubar chhaTe to pata chale
suraj ka haal raat kaTe to pata chale
chehron ke ḳhad-o-ḳhal salamat hain ya nahin
ab a.inon se gard haTe to pata chale
zulmat ke karobar men us ka bhi ek din
chehra ghubar-e-shab se aTe to pata chale
ummid ki ye nannhi kiran vahima na ho
ab chadar-e-siyah phaTe to pata chale
bikhra hua hai mera qabila kahan talak
saughat-e-dard phir se miTe to pata chale
ghar men vo ik purani si tasvir thi ki hai
sail-e-bala ka zor ghaTe to pata chale
Leave a Reply