dagh-dehlvi

Achchhi Surat Pe Ghazab Tut Ke Aana Dil Ka

achchhi surat pe ghazab tuut ke aana dil ka

yaad aata hai hamen haae zamana dil ka

tum bhi munh chuum lo be-sakhta pyaar aa jaae

main sunaun jo kabhi dil se fasana dil ka

nigah-e-yar ne ki khana-kharabi aisi

na thikana hai jigar ka na thikana dil ka

puuri mehndi bhi lagani nahin aati ab tak

kyunkar aaya tujhe ghairon se lagana dil ka

ghuncha-e-gul ko vo mutthi men liye aate the

main ne puchha to kiya mujh se bahana dil ka

in hasinon ka ladakpan hi rahe ya allah

hosh aata hai to aata hai satana dil ka

de khuda aur jagah siina o pahlu ke siva

ki bure vaqt men ho jaae thikana dil ka

meri aghosh se kya hi vo tadap kar nikle

un ka jaana tha ilahi ki ye jaana dil ka

nigah-e-sharm ko be-tab kiya kaam kiya

rang laaya tiri aankhon men samana dil ka

ungliyan tar-e-gareban men ulajh jaati hain

sakht dushvar hai hathon se dabana dil ka

huur ki shakl ho tum nuur ke putle ho tum

aur is par tumhen aata hai jalana dil ka

chhod kar us ko tiri bazm se kyunkar jaun

ik janaze ka uthana hai uthana dil ka

be-dili ka jo kaha haal to farmate hain

kar liya tu ne kahin aur thikana dil ka

baad muddat ke ye ai ‘dagh’ samajh men aaya

vahi daana hai kaha jis ne na maana dil ka

More Poems

Leave a Comment