Bismil Azimabadi
ye but phir ab ke bahut sar uTha ke baiThe hain
ḳhuda ke bandon ko apna bana ke baiThe hain
hamare samne jab bhi vo aa ke baiThe hain
to muskura ke nigahen chura ke baiThe hain
kaleja ho gaya zaḳhmi firaq-e-janan men
hazaron tir-e-sitam dil pe kha ke baiThe hain
tum ek baar to ruḳh se naqab sarka do
hazaron talib-e-didar aa ke baiThe hain
ubhar jo aati hai har baar mausam-e-gul men
ik aisi choT kaleje men kha ke baiThe hain
ye but-kada hai idhar aa.iye zara ‘bismil’
buton ki yaad men bande ḳhuda ke baiThe hain
pasand aa.egi ab kis ki shakl ‘bismil’ ko
nazar men aap jo us ki sama ke baiThe hain
Leave a Reply