ye bhi koi vaz.a aane ki hai jo aate ho tum
ek dam aa.e nahin guzra ki phir jaate ho tum
duur se yuun to koi jhamki dikha jaate ho tum
par jo chahun ye ki paas aao kahan aate ho tum
kahiye mujh se to bhala itna ki kuchh main bhi sunun
banda-parvar kis ke haan tashrif farmate ho tum
us pari-surat bala-angez ko dekha nahin
naseho ma.azur ho gar mujh ko samjhate ho tum
dekhiye ḳhirman pe ye barq-e-bala kis ke paḌe
be-tarah kuchh tevari badle chale aate ho tum
jo koi banda ho apna is se phir kya hai hijab
main to is laa.eq nahin jo mujh se sharmate ho tum
aaj ye go aur ye maidan unhen kah dijiye
dekh luun jin ke bharose mujh ko dhamkate ho tum
phir na avenge kabhi aisi hi gar azurda ho
bas chale ham ḳhush raho kaahe ko jhunjlate ho tum
halat-e-‘bedar’ ab kya kijiye aap aage bayan
vaqt hai ab bhi agar tashrif farmate ho tum
Leave a Reply