Aaina Pyar Ka Ek Aks Tera Mange Hai

aa.ina pyaar ka ik aks tira mange hai

dil bhare shahr men bas teri sada mange hai

jism ḳhud-sar hai ki har dard sahe jaata hai

aisa ziddi hai ki jiine ki saza mange hai

raat Dhal jaa.e to hathon ki lakiren jagen

be-sukun zehn hamesha ye dua mange hai

ḳhush badan ho to zara ḳhud ko bacha kar rakkho

mausam-e-zard koi peḌ hara mange hai

main hi ḳhud ko kisi maqtal men saja kar rakh duun

tez andhi koi nanha sa diya mange hai

kaun hai jo ki sarabon se ulajhna chahe

kaun hai jo ki mire ghar ka pata mange hai

parvarish jis men gul-e-taza ki hoti hai ‘niyaz’

pyaar ka phuul vahi ab-o-hava mange hai