ye bebasi to umuman hi saath hoti hai
hamare samne jab us ki zaat hoti hai
har ek baat ki jis men tumhara zikr nahin
vo jaise dusre maslak ki baat hoti hai
hamare gaanv men suraj ghurub ho ki na ho
kisi ke aankh lagane se raat hoti hai
mire huruf mira zabt noch khate hain
tire ḳhayal ki jab vardat hoti hai
ajab tarah se main sab ko pachhaḌta huun magar
ajab tarah se hamesha hi maat hoti hai
ye ḳhamushi hai tiri aankh ki fusun-kari
ye lafz tere labon ki zakat hoti hai
bas itna soch ke ‘sahir’ main us se kahta nahin
ki us ke dhyan men shayad vo baat hoti hai
Leave a Reply