ye baat alag hai mira qatil bhi vahi tha
is shahr men tarif ke qabil bhi vahi tha
asan tha bahut us ke liye harf-e-muravvat
aur marhala apne liye mushkil bhi vahi tha
tabir thi apni bhi vahi ḳhvab-e-safar ki
afsana-e-mahrumi-e-manzil bhi vahi tha
ik haath men talvar thi ik haath men kashkol
zalim to vo tha hi mira saa.il bhi vahi tha
ham aap ke apne hain vo kahta raha mujh se
aḳhir saf-e-aghyar men shamil bhi vahi tha
main lauT ke aaya to gulistan-e-havas men
tha gul bhi vahi shor-e-anadil bhi vahi tha
daave the ‘zafar’ us ko bahut ba-ḳhabari ke
dekha to mire haal se ghafil bhi vahi tha
Leave a Reply