Asra Rizvi
ye aag mohabbat ki bujha.e na bujhe hai
bujh jaa.e jo ik baar jala.e na jale hai
TuuTa jo bharam rishton men ehsas-o-vafa ka
sau tarah nibhao to nibha.e na nibhe hai
ḳhvabon ka mahal yuun hi banaya na karo tum
ta.amir jo ho jaa.e gira.e na gire hai
dahliz pe dil ki jo qadam rakkhe hai koi
Tik jaa.e hai aise ke hila.e na hile hai
hai bagh-e-mohabbat men vafa ka jo hasin gul
murjha jo gaya phir to khila.e na khile hai
dil chiiz hai aisi ki ujaḌ jaa.e jo ek baar
phir laakh basao to basa.e na base hai
kyuun naqsh liye chashm-e-tasavvur men phiro ho
ho jaa.e ye gahra to miTa.e na miTe hai
koshish to bahut ki hai ki dhul jaa.e har ik aks
ik shakl hai aisi ki baha.e na bahe hai
dekh aa.i hain shayad kahin mahbub ko apne
ankhon ki chamak aaj chhupa.e na chhupe hai
baton man jo kar jaa.e hai iqrar-e-mohabbat
phir baat koi us se bana.e na bane hai
har-gam qadam apna sambhale rakho ‘asra’
daman pe laga daagh chhuḌa.e na chhuTe hai
Leave a Reply