Mushafi Ghulam Hamdani
vo chandni raat aur vo mulaqat ka aalam
kya lutf men guzra hai gharaz raat ka aalam
jaata huun jo majlis men shab us rashk-e-pari ki
aata hai nazar mujh ko tilismat ka aalam
barson nahin karta tu kabhu baat kisu se
mushtaq hi rahta hai tiri baat ka aalam
kar majlis-e-ḳhuban men zara sair ki baham
hota hai ajab un ke isharat ka aalam
dil us ka na loTe kabhi phulon ki safa par
shabnam ko dikha duun jo tire gaat ka aalam
ham log sifat us ki bayan karte hain varna
hai vahm o ḳhirad se bhi pare zaat ka aalam
vo kaali ghaTa aur vo bijli ka chamakna
vo menh ki bauchhaḌen vo barsat ka aalam
dekha jo shab-e-hijr to roya main ki us vaqt
yaad aaya shab-e-vasl ke auqat ka aalam
ham ‘mus.hafi’ qaane hain ba-ḳhushk-o-tar-e-giti
hai apne to nazdik musavat ka aalam
Leave a Reply