Yaro Har Gham Gham-E-Yaran Hai Qarib Aa Jao

yaaro har ġham ġham-e-yārāñ hai qarīb aa jaao

pyāro phir fasl-e-bahārāñ hai qarīb aa jaao

duur ho kar bhī sunīñ tum ne hikāyāt-e-vafā

qurb meñ bhī vahī unvāñ hai qarīb aa jaao

ham mohabbat ke musāfir haiñ kahīñ dekh na le

ghaat meñ gardish-e-daurāñ hai qarīb aa jaao

jaao ab jaao ki vo ahd-e-vafā ḳhatm huā

jab bhī dekho ki phir imkāñ hai qarīb aa jaao

aaj duniyā ko nahīñ apne ġhamoñ se fursat

aaj mil baiThnā āsāñ hai qarīb aa jaao

mere hī pahlū-e-sozāñ meñ sukūñ mumkin hai

chār-sū gardish-e-daurāñ hai aa jaao

maiñ zamāne kī kaḌī dhuup kā maarā huuñ ‘zafar’

tum jahāñ ho chamanistāñ hai qarīb aa jaao

Leave a Comment