Yusuf Zafar
yaaro har gham gham-e-yaran hai qarib aa jaao
pyaro phir fasl-e-baharan hai qarib aa jaao
duur ho kar bhi sunin tum ne hikayat-e-vafa
qurb men bhi vahi unvan hai qarib aa jaao
ham mohabbat ke musafir hain kahin dekh na le
ghaat men gardish-e-dauran hai qarib aa jaao
jaao ab jaao ki vo ahd-e-vafa ḳhatm hua
jab bhi dekho ki phir imkan hai qarib aa jaao
aaj duniya ko nahin apne ghamon se fursat
aaj mil baiThna asan hai qarib aa jaao
mere hi pahlu-e-sozan men sukun mumkin hai
char-su gardish-e-dauran hai aa jaao
main zamane ki kaḌi dhuup ka maara huun ‘zafar’
tum jahan ho chamanistan hai qarib aa jaao
Leave a Reply