dekhta huun tujh ko aksar ai samundar ai samundar
jaise ho tu mere andar ai samundar ai samundar
tere tufanon ne ki yalghar chaTTanon pe shab bhar
shor tha bam-e-falak par ai samundar ai samundar
DhunDhti hai aankh sat.h-e-ab par chehra kisi ka
tu bana de us ka paikar ai samundar ai samundar
be-karani men tu apni meri virani samo le
main hua huun phir se be-ghar ai samundar ai samundar
tirgi ki phailti chadar hai ham donon hi chup kyon
guunj uTh manzar-ba-manzar ai samundar ai samundar
dekhne aaya hai tujh men duur se chal kar ‘ovaisi’
Dubte suraj ka manzar ai samundar ai samundar
Leave a Reply