hone ka e’tibar nahin kar rahe hain log
ab ḳhud ko iḳhtiyar nahin kar rahe hain log
ab ishq aur dasht ḳhasare men hain miyan
ab dil ka karobar nahin kar rahe hain log
tayyar hai tamasha dikhane ko ek shaḳhs
mahaul sazgar nahin kar rahe hain log
ab hai nizam-e-ishq men tarmim ka chalan
taron ka bhi shumar nahin kar rahe hain log
hairan huun ki itni riyazat ke bavajud
kyuun vaqt ko ghubar nahin kar rahe hain log
ḳhush huun ki asman se hai qaa.em zamin ka rabt
dukh hai ki pa.edar nahin kar rahe hain log
shayad ki meri maut ka elaan ho chuka
ab mujh pe koi vaar nahin kar rahe hain log
aage ki dauḌ men hue mahdud is tarah
maazi pe eqtidar nahin kar rahe hain log
ai yaar apne husn pe kuchh ḳhaak Daal de
ab ishq iḳhtiyar nahin kar rahe hain log
ab nisf shab nikalte hain be-ḳhauf kaam par
suraj ka intizar nahin kar rahe hain log
Leave a Reply