yarab dil-o-nazar pe musallat kabhi na ho
vo be-ḳhudi ki jis men shu.ur-e-ḳhudi na ho
itna na duur jaao had-e-iḳhtilaf se
mumkin hai phir vahan se kabhi vapsi na ho
dil men ḳhulus ho to ho ik mustaqil ḳhulus
vo kya ḳhulus hai jo kabhi ho kabhi na ho
tark-e-ta.alluqat ki ik shart ye bhi thi
dil TuuT jaa.e aur koi avaz bhi na ho
ji chahta hai phulon se kuchh guftugu karun
phir sochta huun bad-e-saba dekhti na ho
‘gauhar’ dil-o-nigah men ik fasl to rahe
lekin dil-o-nazar ka tasadum kabhi na ho
Leave a Reply