yaqin ke bhi kya kya hijabat hain
haqiqat ki zid e.atiqadat hain
taraqqi ke raste na khulte magar
ye sab doston ki inayat hain
ye zanjir bhi itni mohkam nahin
haqa.eq bhi zaati ḳhayalat hain
koi shaḳhs ḳhubi se ḳhali nahin
har ik shaḳhs ke apne halat hain
falak ko bhi dekhenge lekin abhi
zamin par bhi kitne maqamat hain
ada kuchh kiya nasl-e-farda ka qarz
ki ham ai zamane tire saath hain
Leave a Reply