Insha Allah Khan Insha
yaan zaḳhmi-e-nigah ke jiine pe harf hai
hai dil par apne zaḳhm ki siine pe harf hai
zar-ḳharchiyan kahan talak apni bayan karen
qarun ki bhi yaan to ḳhazine pe harf hai
milte the chauthe panchven vo vaqt to gaya
ab ye ki chaar panch mahine pe harf hai
kya daḳhl vo jo haath se mere piyen sharab
vaan kahte kahte baat bhi piine pe harf hai
tufan-e-ashk ‘nuh’-alaihissalam se
bola ki aap ke bhi safine pe harf hai
na-chiz aap jante hain is qadar mujhe
ulfat to jaave bhaaḌ men kiine pe harf hai
naseh jigar ke zaḳhm ko jarrah kya siye
yaan sozan-e-masih ke siine pe harf hai
yaan har bun-e-masam men ḳhunaba hai ravan
nikle to ḳhuun hi nikle pasine pe harf hai
‘insha’ ki mohr paḌhiye bhala ashna hua
kandida koi is ke nagine pe harf hai
ab dhyan kar ke dekhiye kya hai gaTha hua
is ka har ek apne qarine pe harf hai
Leave a Reply