Poet
kyuun khud-bakhud phiri nigah-e-yar kya sabab
kyuun sar-nigun hai abru-e-kham-dar kya sabab
qismat palat gai ki nasiba ulat gaya
kyuun khud-bakhud phiri nigah-e-yar kiya sabab
kya aa gaya qarib zamana visal ka
kyuun be-qarar hai ye dil-e-zar kya sabab
taqat kahan se aa gai is na-tavan men aaj
dam todta jo hai dil-e-bimar kya sabab
kis se ladi nigah ye kis par itaab hai
hote hain band rauzan-e-divar kya sabab
furqat ki raat roz-e-qayamat kahin na ho
hoti nahin jo subh-e-shab-e-tar kya sabab
‘anjum’ gae the un ko sunane ki vaste
phir hal-e-dil kiya jo na izhar kya sabab
Leave a Reply