yak do jaam aur bhi de tu saaqi
na rahe dil men aarzu saaqi
meri taskin na hogi saghar se
munh se mere laga subu saaqi
raat o din mai-kashon ko rahti hai
teri hi yaad o justuju saaqi
rind-e-muflis ko de hai zyaad sharab
bhaai mujh ko tiri ye khu saaqi
aah tujh bin hain zar-o-nalan ham
bhuli masti ki hav-hu saaqi
shisha-e-mai ki tarah se ham aaj
rakhte hain girya dar-gulu saaqi
kisi ke aage misl-e-saghar ham
laate hain dast-e-arzu saaqi
laate hain misl-e-shisha-e-bada
tere hi aage sarfaru saaqi
ro nahin us ko bazm-e-mastan men
jis ke taiin tu na deve ru saaqi
de ‘jahandar’ ko vo mai jis ka
hove gul ka sa rang-o-bu saaqi