yaad to aa.e ka.i chehre har ik gaam ke ba.ad
koi bhi naam kahan aaya tire naam ke ba.ad
dasht-o-dariya men kabhi gulshan-e-sahra men kabhi
main raha mahv-e-safar ik tire paigham ke ba.ad
gamzan rah-e-junun par hain to phir sochna kya
kisi anjam se pahle kisi anjam ke ba.ad
dil ka har kaam faqat us ki nazar karti hai
naam aata hai magar mera har ilzam ke ba.ad
meri be-tabi-e-dil mera muqaddar Thahri
shab-e-alam se pahle shab-e-alam ke ba.ad
kaam leta hai mujhi se vo musibat men sada
bhuul jaata hai magar mujh ko mire kaam ke ba.ad
barha us ne mira naam miTaya ‘anjum’
ro paḌa phir vo har ik baar isi kaam ke ba.ad
Leave a Reply