Yaad Karne Ke Zamane Se Bahut Aage Hain

yaad karne ke zamāne se bahut aage haiñ

aaj ham apne Thikāne se bahut aage haiñ

koī aa ke hameñ DhūñDegā to kho jā.egā

ham na.e ġham meñ purāne se bahut aage haiñ

jism baaqī hai magar jaañ ko miTāne vaale

ruuh meñ zaḳhm nishāne se bahut aage haiñ

is qadar ḳhush haiñ ki ham ḳhvāb-e-farāmoshī meñ

jaag jaane ke bahāne se bahut aage haiñ

jo hameñ pā ke bhī khone se bahut pīchhe thā

ham use kho ke bhī paane se bahut aage haiñ

Leave a Comment