Gulnar Aafreen
yaad karne ka tumhen koi irada bhi na tha
aur tumhen dil se bhula den ye gavara bhi na tha
har taraf tapti hui dhuup thi ai umr-e-ravan
duur tak dasht-e-alam men koi saaya bhi na tha
mishal-e-jan bhi jalai na gai thi ham se
aur palkon pe shab-e-gham koi taara bhi na tha
ham sar-e-rah-e-vafa us ko sada kya dete
jaane vaale ne palat kar hamen dekha bhi na tha
ho gai khatm sarabon men bhatakti hui ziist
dil men hasrat hi rahi dasht men dariya bhi na tha
kis khamoshi se jala daman-e-dil ai ‘gulnar’
koi shola bhi na tha koi sharara bhi na tha
Leave a Reply