Sufi

Wo Umangen Nahin Ab Wo Dil-e-Nashad Nahin

vo umangen nahin ab vo dil-e-nashad nahin

vaqia khvab sa kuchh yaad hai kuchh yaad nahin

kaun se zarre pe duniya-e-gham abad nahin

dil-e-barbad hamara dil-e-barbad nahin

vo ho duniya ki lahad ya ki ho roz-e-mahshar

mubtala-e-gham-e-janan kahin azad nahin

tu jo sargarm-e-tamasha ho dam-e-mashq-e-sitam

kis ko phir shauq-e-shahadat sitam-ijad nahin

paas hai zabt-e-mohabbat ka sitamgar varna

ik nafas bhi mira begana-e-fariyad nahin

ab to har samt nazar aate hain jalve jalve

be-khudi men koi parda dil-e-nashad nahin

kavish-e-dam-o-qafas mere liye thi goya

varna gulshan hai vahi aaj bhi sayyad nahin

tabish-e-husn se ik be-khudi chhai pahle

baad us ke hua phir kya ye mujhe yaad nahin

mar ke ‘afqar’ yahan milti hai hayat-e-javed

astan yaar ka hai jannat-e-shaddad nahin

More Poems

Leave a Comment