Poet
ajab tu ne jalva dikhaya mujhe
ki aalam men phir kuchh na bhaya mujhe
karun kya bayan main ye ehsan-e-ishq
ki qatre se dariya banaya mujhe
fida huun main us naz-e-jan-bakhsh par
ki juun juun mua men jilaya mujhe
tiri zulf-e-pechan ne ai rashk-e-gul
hazaron bala men phansaya mujhe
rulaya kabhun mujh ko manind-e-abr
kabhun barq-asa hansaya mujhe
jo apne taiin main ne dekha baghaur
sarapa nazar tu hi aaya mujhe
main huun shah-e-khadim par ‘asim’ fida
ki juun juun main bigda banaya mujhe
Leave a Reply