bulbulo baghban ko kyuun chheda
tum ne saz-e-fughan ko kyuun chheda
mujh ko us turk se ye shikva hai
dil pe rakh kar sinan ko kyuun chheda
na bula laae mujh sa divana
sangsar-e-jahan ko kyuun chheda
ai huma! aur khane the murde
mere hi ustukhan ko kyuun chheda
bahla nadim ho ji men kahta hai
main ne is momiyan ko kyuun chheda
phir gaya mujh se jo mizaj us ka
gardish-e-asman ko kyuun chheda
duur se us ne meri surat dekh
tosan-e-khush-inan ko kyuun chheda
dastan apni mujh ko kahni thi
qissa-e-in-o-an ko kyuun chheda
qissa-khvan aur laakh qisse the
tu ne zikr-e-butan ko kyuun chheda
jis se kal mujh ko aa gai thi ghashi
phir usi dastan ko kyuun chheda
‘mushafi’ ghar ke ghar jala dega
aise atish-zaban ko kyuun chheda
Leave a Reply