Wo Ru-E-Kitabi To Hai Quran Hamara

vo ru-e-kitabi to hai quran hamara

kahte hain jise ishq hai iman hamara

hathon ki shikayat hai hamen dasht-e-junun men

paanv men ulajhta hai gareban hamara

har subh dikhata hai hamen jalva pari ka

bala-e-hava-dar sulaiman hamara

hain mardum-e-gham-dida ke danton ki tarah band

misl-e-dahan-e-nang hai zindan hamara

ham khana-kharabon se mile kya koi aa kar

darvaza-e-uftada hai darban hamara

rahta hai hamen dhyan tumhara hi hamesha

tum ko nahin aata hai kabhi dhyan hamara

aa jaae abhi jaan men jaan aao agar tum

tan hijr men be-jan hai ai jaan hamara

be-khatke tavahhush men na kyuun daudte phiriye

pahlu men hai be-khar bayaban hamara

li jaan khuda ne kisi but ne na kiya qatl

nikla na dam-e-marg bhi arman hamara

li ham ne bala apne hi sar sab ko bachaya

ai jaan hai aghyar pe ehsan hamara

har bait men ik shahid-e-maani ki hai tasvir

‘nasikh’ hai muraqqaa nahin divan hamara

Leave a Comment