Farooq Bakshi
vo na aa.ega yahan vo nahin aane vaala
mujh ko tanha.i ka ehsas dilane vaala
kya ḳhabar thi ki taras ja.ega ta.abiron ko
apni ankhon men tire ḳhvab sajane vaala
apni tadbir ke anjam se na-vaqif hai
haal taqdir ka auron ko batane vaala
meri rag rag men lahu ban ke ravan ho jaise
mere saa.e se bhi daman ko bachane vaala
kamyabi se bahar-hal ḳhushi hoti hai
hans raha hai mujhe divana banane vaala
bazm ki aur hai tanha.i ki duniya kuchh aur
raat bhar rota raha din men hansane vaala
hama-tan gosh bana deta hai mujh ko ‘faruq’
us ki baton ka vo andaz lubhane vaala
Leave a Reply