Wajeeh Sani
honT masruf-e-dua aankh savali kyuun hai
dil ke manind mira zehn bhi ḳhali kyuun hai
vo to naraz hai mujh se to phir aḳhir us ne
muskurahaT si miri samt uchhali kyuun hai
us ko hairat mire sheron pe nahin is par hai
mere shane pe jo chadar hai vo kaali kyuun hai
vo bhi kya din the tiri soch ko chhu sakta tha
ab tira aks faqat aks-e-ḳhayali kyuun hai
kya bataoge ki ham men se vafa kis ne ki
tum ne mahfil men miri baat nikali kyuun hai
is irade se men baiTha tha ghazal likhne ko
sochta huun tiri tasvir bana li kyuun hai
ab main jaane nahin deta to bura manti ho
is qadar pyaar ki aadat mujhe Daali kyuun hai
Leave a Reply