vo misl-e-mauj-e-bahar apne shabab ki samt aa rahe hain
dilon ke ghunche khila rahe hain nazar ka daman saja rahe hain
har ek zarre men har faza men vo husn ban kar sama rahe hain
hamari tab-e-nigah ko vo har a.ina aazma rahe hain
hamare aansu suna rahe hain shikasta dil ka fasana un ko
magar qayamat ki baat hai ye vo sun ke bhi muskura rahe hain
dil-o-jigar ḳhuun ho chuke hain hamare lab par magar hansi hai
ham apne afsana-e-vafa ko kuchh aur rangin bana rahe hain
jo mahv-e-zulm-o-sitam tha kal tak vo aaj shayad badal gaya ho
ye aarzu le ke ham dobara kisi ke kuche men ja rahe hain
falak ka andaz kah raha hai hamare arman ka ḳhuun hoga
abhi to aghaz-e-shab hai aḳhir sitare kyuun jhilmila rahe hain
hamari qismat ka pher dekho talash-e-manzil men umr guzri
magar jahan se chale the kashfi vahin pe ham ḳhud ko pa rahe hain
Leave a Reply