Wo Ki Har Ahd-E-Mohabbat Se Mukarta Jae

Alamtaab Tishna

vo ki har ahd-e-mohabbat se mukarta jaa.e

dil vo zalim ki usi shaḳhs pe marta jaa.e

mere pahlu men vo aaya bhi to ḳhushbu ki tarah

main use jitna sameTun vo bikharta jaa.e

khulte jaa.en jo tire band-e-qaba zulf ke saath

rang-e-pairahan-e-shab aur nikharta jaa.e

ishq ki narm-nigahi se hina hon ruḳhsar

husn vo husn jo dekhe se nikharta jaa.e

kyuun na ham us ko dil-o-jan se chahen ’tishna’

vo jo ik dushman-e-jan pyaar bhi karta jaa.e