Mahmood Shaam
roz-o-shab ki shaḳh se bichhḌa hua patta huun main
vaqt bhi ab DhunDhta hai jis ko vo lamha huun main
dil ke shishe TuuT jaate hain miri avaz se
ik shikasta saaz se ubhra hua naghma huun main
ham-nashinon ko kabhi aati nahin hai aanch tak
kitni ThanDi aag hai jis men sada jalta huun main
zindagi ke shor men simTe rahe zarre mire
ik zara tanha hua to kis tarah bikhra huun main
rangton ka sail tha ya ḳhushbuon ki lahr thi
ab talak us husn men us jhiil men Duuba huun main
in chamakti shah-rahon par kise apna kahun
shahr hain abad apnon se magar tanha huun main
‘sham’ yuun to ab ḳhalaon men hain apni manzilen
aur dekhun to usi dharti se be-rishta huun main
Leave a Reply