Dil Ke Shajar Ko KHun Se Gulnar Dekh Kar

dil ke shajar ko ḳhuun se gulnār dekh kar

ḳhush huuñ na.ī bahār ke āsār dekh kar

sahrā bhale ki zehan ko kuchh to sukūñ mile

ghabrā gayā huuñ shahar ke bāzār dekh kar

aage baḌhe to tīrgī-e-shab ne aa liyā

nikle the ghar se sub.h ke āsār dekh kar

aañsū gire to dil kī zamīñ aur jal uThī

barsā hai abr ḳhaak kā me.aar dekh kar

saare jahāñ ko halqa-e-mātam samajh liyā

apnā vajūd nuqta-e-pur-kār dekh kar

auroñ ko tū ne daulat-e-kaunain baañT dī

ġham mujh ko de diyā hai sazā-vār dekh kar

baiThe to aañch dene lagī pīpaloñ kī chhāñv

aa.e the log sāya-e-ashjār dekh kar

jis tarah koī bachhḌā huā dost mil gayā

ham muskurā diye rasan-o-dār dekh kar

baiThā huuñ apne fikr ke saa.e meñ der se

har āshnā ko un kā taraf-dār dekh kar

‘zulfī’ dukhoñ kī dhuup meñ jalte hue badan

bādal guzar gayā hai ka.ī baar dekh kar

Leave a Comment