vo kam-nasib jo ahd-e-jafa men rahte hain
ajiib ma.ariz-e-karb-o-bala men rahte hain
numud-e-zauq o bulugh-e-hunar ka zikr hi kya
yahan ye log to ah-o-buka men rahte hain
vida-e-ḳhuld ke ba.ad arsa-e-firaq men hain
ba-qaid-e-jism dayar-e-fana men rahte hain
vo sub.h o shaam miri ruuh men hain jalva-numa
dil-e-figar o alam-ashna men rahte hain
hisar-e-zat men mahbus ho ke ahl-e-havas
fareb-e-hasil-e-be-mudda.a men rahte hain
bhula chuke hain zamin o zaman ke sab qisse
suḳhan-taraz hain lekin ḳhala men rahte hain
amir-e-shahr ki sohbat ke faiz se ‘aḳhtar’
janab-e-shaiḳh ab unchi hava men rahte hain
Leave a Reply