vo kahan saath sulate hain mujhe
khvab kya kya nazar aate hain mujhe
us pari-vash se lagate hain mujhe
log divana banate hain mujhe
ya rab un ka bhi janaza utthe
yaar us ku se uthate hain mujhe
abru-e-tegh se iima hai ki aa
qatl karne ko bulate hain mujhe
bevafai ka udu ki hai gila
lutf men bhi vo satate hain mujhe
hairat-e-husn se ye shakl bani
ki vo aina dikhate hain mujhe
phunk de atish-e-dil daagh mire
us ki khu yaad dilate hain mujhe
gar kahe ghamza kise qatl karun
to isharat se batate hain mujhe
main to us zulf ki bu par ghash huun
charagar mushk sunghate hain mujhe
shola-ru kahte hain aghyar ko vo
apne nazdik jalate hain mujhe
jaan gai par na gai jaur-kashi
bad-e-murdan bhi dabate hain mujhe
vo jo kahte hain tujhe aag lage
muzhda-e-vasl sunate hain mujhe
ab ye surat hai ki ai parda-nashin
tujh se ahbab chhupate hain mujhe
‘momin’ aur dair khuda khair kare
taur beDhab nazar aate hain mujhe