afeef-siraj

Wo Jo Husn-e-Kul Ki Dalil Tha Wo Khayal Aa Ke Saja Gaya

vo jo husn-e-kul ki dalil tha vo khayal aa ke saja gaya

ladin yuun nigah se bijliyan koi jaise parde utha gaya

main hikayat-e-dil-e-be-nava men isharat-e-gham-e-javidan

main vo harf-e-akhir-e-motabar jo likha gaya na padha gaya

main charagh-e-hasrat-e-nim-shab men sharar-e-atish-e-jan-ba-lab

dil-e-pur-umid ki lau tha main mujhe khud vo aa ke bujha gaya

main ghubar-e-rah-e-talab raha hua dar-ba-dar jo chali hava

main ujad ke jab hua mutmain to vo mujh ko dil men basa gaya

pas-e-parda dil ka rafiq tha sar-e-parda mera raqib tha

main miyan-e-radd-o-qubul tha ki vo aa ke parda hata gaya

mujhe fikr thi miri zaat par koi rang bhi na chadhe magar

vo kamal-e-ghairat-e-aina mira aks mujh ko dikha gaya

mira dil amiin tha nigah ka thi nigah mahram-e-tajraba

vo fusun-e-jalva ki aabru mire tajrabon ko mita gaya

More Poems

Leave a Comment