Sabir Zafar
qismat men agar juda.iyan hain
phir kyuun tiri yaden a.iyan hain
yaan jiine ki suraten hain jitni
vo suraten sab para.iyan hain
fariyad-kunan nahin bas ik main
charon hi taraf duha.iyan hain
har darje pe ishq kar ke dekha
har darje men bevafa.iyan hain
ik tera bura kabhi na chaha
go ham men bahut bura.iyan hain
taqrib-e-visal-e-yar hai kya
kuche men tire safa.iyan hain
us ne bhi kasar koi koi chhoḌi
ham ne bhi bahut suna.iyan hain
ab aur kahin ka ruḳh karen aap
is jag men to jag-hansa.iyan hain
kaise karen bandagi ‘zafar’ vaan
bandon ki jahan ḳhuda.iyan hain
Leave a Reply