poet

Aazurda Ho Gaya Wo Kharidar Be-Sabab

azurda ho gaya vo kharidar be-sabab

dil bech kar hua main gunahgar be-sabab

main ne to us se aankh ladai nahin kabhi

abru ne mujh pe khinchi hai talvar be-sabab

main ne balaen bhi nahin liin zulf-e-yar ki

main ho gaya bala-e-giraftar be-sabab

bosa kabhi liya nahin gul se ezaar ka

kyuun dil ke aable men chubha khaar be-sabab

kyuun uth khade hue vo bhala main ne kya kaha

pahlu men baith kar hue bezar be-sabab

puchhe to koi kya mire taqsir kya gunah

karta hai kyuun sitam vo sitamgar be-sabab

ik raat bhi hansa nahin us shama-ru se main

aansu mire gale ke hue haar be-sabab

kis din do-char nargisi ankhon se main hua

is ishq ne kiya mujhe bimar be-sabab

jo un ki baat hai vo ladakpan ke saath hai

iqrar be-jahat hai to inkar be-sabab

phaha jagah ki daagh ka shayad sarak gaya

ye chashm-e-tar nahin hai sharar-bar be-sabab

dikhla ki ye bahar shagufa phulaenge

odha nahin do-shala-e-gulnar be-sabab

nikle the mujh par aaj vo talvar bandh kar

rahgir kushta ho gae do-char be-sabab

aamad nahin kisi ki to kyuun jagte ho ‘bahr’

rahta hai shab ko koi bhi bedar be-sabab

More Poems

Leave a Comment