vo jo din hijr-e-yar men guzre
kuchh taḌap kuchh qarar men guzre
vahi hasil the zindagani ke
chaar din jo bahar men guzre
kya kiya tum se kaise kaise vahm
dil-e-be-e’tibar men guzre
kitni kaliyon ke kitne phulon ke
qafile nau-bahar men guzre
zindagi ke liye mile the jo din
maut ke intizar men guzre
hasraton ke hujum men tiri yaad
jaise mahmil ghubar men guzre
ham chaman men rahe to aise rahe
jaise din ḳharzar men guzre
gham-e-janan se bach rahe the jo din
vo gham-e-rozgar men guzre
zindagi ki yahi tamanna thi
aap ki rahguzar men guzre
jan-nisaron ka ja.eza tha vahan
ham bhi pichhli qatar men guzre
kaaTe kaTta nahin vo vaqt ‘raza’
jo kisi intizar men guzre
Leave a Reply