Saleem Shahid
murda ragon men ḳhuun ki garmi kahan se aa.i
thi shaḳh sabz phuul men surḳhi kahan se aa.i
ye umr-e-ra.egan ye safar ḳhvab men kaTa
phir ye thakan ye paanv pe miTTi kahan se aa.i
divar ḳhun-chakan na mira zaḳhm-e-sar hai surḳh
ye maslahat bata dil-e-vahshi kahan se aa.i
main sulh jo hua ghalat ilzam se ḳhafa
ab puchhte ho baat men talḳhi kahan se aa.i
ilzam tum pe hai lab-e-goya gurez ka
bebak ho to phir ye ḳharabi kahan se aa.i
mujh jaisa kam-suḳhan bhi hai is baar saḳht-go
is sust ab-ju men ravani kahan se aa.i
khilta hai mausamon ke taghayyur ka mujh se rang
aḳhir mire ḳhamir ki miTTi kahan se aa.i
Leave a Reply