Sagheer Malal
vo haqiqat men ek lamha tha
jis ka dauran ye zamana tha
meri nazron se gir paḌi hai zamin
kyuun bulandi ne is ko dekha tha
kaisi paivand-kar hai fitrat
muntashir ho ke bhi main yakja tha
raushni hai kisi ke hone se
varna buniyad to andhera tha
jab bhi dekha naya laga mujh ko
kya tamasha jahan-e-kohna tha
us ne mahdud kar diya ham ko
koi ham se yahan zyada tha
jab ki suraj tha palne vaala
chand se kya lahu ka rishta tha
mar gaya jo bhi us ke baare men
dhyan paḌta nahin ki zinda tha
yahin paida yahin javan hua
us ke lab par kahan ka qissa tha
koi gunjan tha koi viran
koi jangal kisi men sahra tha
umr saari vo niind men bola
chand lamhon ko koi jaaga tha
kahin jaane ki sab ne baten kiin
kaise aate hain kaun bola tha
saari uljhan usi se paida hui
vo jo vahid hai be-tahasha tha
dauḌte phir rahe the saare log
jab ki un ko yahin pe rahna tha
tujh ko laana hisar men apne
mera adna sa ik karishma tha
farq gahra.i aur pasti men
kisi bulandi se dekh paaya tha
us ki tafsil men tha sargardan
zehn men muḳhtasar sa ḳhaka tha
paas aa kar use hua malum
main akela nahin tha tanha tha
kitne fisad the jagne vaale
kitne logon ko hosh aaya tha
kis ko ibnus-sabil kahte ‘malal’
na.e raston ka kaun beTa tha
Leave a Reply