Farigh Bukhari
hue hain sard dimaghon ke dahke dahke alaav
nafas ki aanch se fikr-o-nazar ke diip jalao
kiran kiran ko siyah badliyon ne gher liya hai
tasavvurat ke dhundle charagho raah dikhao
kahan hai gardish-e-dauran kidhar hai sail-e-havadis
sukun-e-marg-e-musalsal men Dubne lagi naav
kabhi ḳhizan ke bagule kabhi bahar ke jhule
samajh sake na zamane ke ye utaar chaḌhao
ajiib sa hai ḳharabat ke faqihon ka fatva
bhaḌakte sho.alon se tapte dilon ki pyaas bujhao
hazar gardanen ḳham hon bura nahin pe sitam hai
ḳhayal-o-fikr ki pasti nigah-o-dil ka jhukao
Leave a Reply