Wo Ek shaKHs Ki Jis Se Shikayaten Thin Bahut

Nasir Zaidi

vo ek shaḳhs ki jis se shikayaten thiin bahut

vahi aziiz usi se mohabbaten thiin bahut

vo jab mila to dilon men koi talab hi na thi

bichhaḌ gaya to hamari zaruraten thiin bahut

har ek moḌ pe ham TuTte bikharte rahe

hamari ruuh men pinhan qayamaten thiin bahut

pahunch ga.e sar-e-manzil tiri tamanna men

agarche raah kaThin thi sa.ubaten thiin bahut

vo yuun mila hai ki jaise kabhi mila hi na tha

hamari zaat pe jis ki inayaten thiin bahut

hamen ḳhud apne hi yaron ne kar diya rusva

ki baat kuchh bhi na thi aur vazahaten thiin bahut

hamare ba.ad hua us gali men sannaTa

hamare dam se hi ‘nasir’ hikayaten thiin bahut