Wo Aise Bigde Hue Hain Kai Mahine Se

vo aise bigde hue hain ka.i mahine se

ki jaan pe ban ga.i tang aa gaya main jiine se

hue numud jo pistan to sharm kha ke kaha

ye kya bala hai jo uthti hai mere siine se

vo duur khinch ke shab-e-vasl us ka ye kahna

koi udhar hi ko baitha rahe qarine se

jo bosa dete hain to lab bachate hain lab se

lipatte bhi hain to siina chura ke siine se

vo saath sona kisi ka vo garm-joshi haae

nami vo jism ki choli vo tar pasine se

ḳhushi yahi hai ki ik din to gham se chhutenge

na maut aae to kya hasil aise jiine se

vo nichi nichi nigahon se dekhna mujh ko

vo pyaar takiye ko karna laga ke siine se

yahi vo raah hai jo dil se dil ko hoti hai

husul kaun sa chak-e-jigar ke siine se

main aur kuchh nahin kahta magar ye sun rakhiye

adu ka dil hai labalab hasad se kiine se

ḳhuda ki shaan hai ye baat aur munh un ka

‘nizam’ phir karun tauba sharab piine se

Leave a Comment