Wo Aai Sham-E-Gham Waqf-E-Bala Hone Ka Waqt Aaya

vo aa.i sham-e-gham vaqf-e-bala hone ka vaqt aaya

taḌapne loTne ka dam fana hone ka vaqt aaya

unhen apni jafaon par pashemani hui aḳhir

sharik-e-matam-e-ahl-e-vafa hone ka vaqt aaya

udasi har sahar kahti hai mujh se bazm-e-anjum ki

uTh ai gham-dida uTh mahv-e-buka hone ka vaqt aaya

tira milna kise milta hai mamnun-e-muqaddar huun

magar afsos milte hi juda hone ka vaqt aaya

bahar aa.i har ik zarre se phuTi husn ki duniya

fareb-e-ma-siva ke haq-numa hone ka vaqt aaya

qayamat-ḳhez hai husn-e-chaman ai bulbul-e-nalan

tire nalon se phir mahshar bapa hone ka vaqt aaya

miri TuuTi hui kashti thapeḌe mauj-e-tufan ke

ḳhuda-e-pak tere naḳhuda hone ka vaqt aaya

javani ja chuki ‘mahrum’ zauq-e-arzu kaisa

tumhare be-niyaz-e-mudda.a hone ka vaqt aaya