ai suḳhnavar tarah guman huun main
ya faqat harf-e-ra.egan huun main
aks jal bujh ga.e bujha chehra
aa.ine se uTha dhuan huun main
hai mayassar mata-e-tishna-labi
ḳhushk dariya ka pasban huun main
aag se bair dhuup bhi hai adu
aur ik mom ka makan huun main
mushtarak ham men hijraton ki thakan
titliyon ka mizaj-dan huun main
tajarbe ki ghaneri chhanv liye
ek kohna sa sa.eban huun main
kab miTa de mujhe hava ki lakir
rah-rau ret par nishan huun main
kal mira vasf tha tariq-e-suluk
aaj be-nam be-nishan huun main
shahr men harf-e-ashna hi nahin
faiz kya lafz be-karan huun main
jo haqiqat the vo ga.e ‘sabir’
ek mauhum dastan huun main
Leave a Reply