vo aa rahe hain husn-e-ḳhud-ara liye hue
hai zarra zarra baḳht-e-surayya liye hue
josh-e-alam darogh ḳhumar-e-nashat jhuuT
tera hi vahm hai ye tamasha liye hue
un ka harim-e-naz hai gharat-gar-e-havas
lauTa hai kaun qalb-e-shakeba liye hue
be-ḳhud na kyon kisi ke tasavvur men ham rahen
har har nafas hai saghar-e-sahba liye hue
maujon ka josh deta hai tufan ki ḳhabar
imroz hai haqiqat-e-farda liye hue
bagh-e-jahan ki sair ko zauq-e-nazar hai shart
nargis na ban tu dida-e-bina liye hue
‘za.iq’ chhupa.e rakhta huun yuun dil men raz-e-dost
jaise sadaf men gauhar-e-yakta liye hue
Leave a Reply