vo aa rahe haiñ husn-e-ḳhud-ārā liye hue
hai zarra zarra baḳht-e-surayyā liye hue
josh-e-alam daroġh ḳhumār-e-nashāt jhuuT
terā hī vahm hai ye tamāshā liye hue
un kā harīm-e-nāz hai ġhārat-gar-e-havās
lauTā hai kaun qalb-e-shakebā liye hue
be-ḳhud na kyoñ kisī ke tasavvur meñ ham raheñ
har har nafas hai sāġhar-e-sahbā liye hue
maujoñ kā josh detā hai tūfān kī ḳhabar
imroz hai haqīqat-e-fardā liye hue
bāġh-e-jahāñ kī sair ko zauq-e-nazar hai shart
nargis na ban tū dīda-e-bīnā liye hue
‘zā.iq’ chhupā.e rakhtā huuñ yuuñ dil meñ rāz-e-dost
jaise sadaf meñ gauhar-e-yaktā liye hue