vida-e-yar ka lamha Thahar gaya mujh men
main ḳhud to zinda raha vaqt mar gaya mujh men
sukut-e-sham men chiḳhen suna.i deti hain
tu jaate jaate ajab shor bhar gaya mujh men
vo pahle sirf miri aankh men samaya tha
phir ek roz ragon tak utar gaya mujh men
kuchh aise dhyan men chehra tira tulua hua
ghurub-e-sham ka manzar nikhar gaya mujh men
main us ki zaat se munkir tha aur phir ik din
vo apne hone ka elaan kar gaya mujh men
khanDar samajh ke miri sair karne aaya tha
gaya to mausam-e-gham phuul dhar gaya mujh men
gali men gunji ḳhamoshi ki chiḳh raat ke vaqt
tumhari yaad ka bachcha sa Dar gaya mujh men
bata main kya karun dil naam ke is angan ka
tiri umiid pe jo saj-sanvar gaya mujh men
ye apne apne muqaddar ki baat hai ‘faris’
main is men simTa raha vo bikhar gaya mujh men
Leave a Reply